Bonus Tydskrif WINTER 2024

Newelblasers: Doeltreffende en effektiewe bespuitings Kursusse wat handel oor plaagdoderhantering en geïntegreerde plaagbestuurapraktyke lê ‘n goeie fondasie, maar uiteindelik moet operateurs, elk in hul eie unieke situasie, bepaal hoe hulle spuit(e) die beste bestuur gaan word. Die regte besluite lei tot die doeltreffende lewering van ‘n effektiewe dosis aan ‘n geïdentifiseerde teiken of teikenarea. ‘Doeltreffend’ beteken die bereiking van maksimum produktiwiteit met minimum vermorsing van hulpbronne soos tyd, geld of produkte. Enige spuitvloeistof wat nie op die beoogde teiken neergelê word nie, word beskou as vermorste hulpbronne (bv. vermorsing, lekkasies, spuitnewelwegdrywing, afloop, ens.). ‘Effektiwiteit’ beteken dat jy suksesvol is daarin om die gewenste of beoogde resultaat te lewer. Effektiewe bespuiting behels die • Identifisering van die teiken. • Identifisering van die produk om toe te dien. • Kennis van die gekose produkeienskappe (bv. metode van werking, formulasie ens.). • Bevoegdheid om die toediening sonder skade toe te pas. Daar is baie elemente wat die operateur voor en tydens ’n bespuiting moet oorweeg (Figuur 1). Aangesien die elemente nie afsonderlik oorweeg kan word nie, oorvleuel hulle. Die veranderinge wat in reaksie op een element gemaak word, sal sekondêre impakte hê. Ter illustrasie: Is dit die regte besluit (operateur: besluitneming) om die druk (spuitontwerp: vloeistof) te verander, wat ‘n sekondêre effek het op die bedekking (konfigurasie: spuitstrategie), omdat die wind (omgewing: wind) by die boomtoppe (teiken: blaardakstruktuur) versterk het, en om dan steeds ‘n effektiewe resultaat (produk: metode van werking) te verwag? Ondersteuning vir operateurs Dit is uiters belangrik om daarop te let dat die operateur bo al die ander elemente geposisioneer is. Die bevoegdheid, oplettendheid en gretigheid van ‘n operateur om ‘n taak goed te verrig, beïnvloed elke bespuiting. ‘n Onwillige operateur, of ‘n gewillige operateur in ‘n enorme korporatiewe boerdery wat nie genoeg ondersteuning kry nie, kan selfs met die beste tegnologie nie ‘n suksesvolle bespuiting verseker nie. Dus is dit noodsaaklik dat, wanneer ‘n beleid ontwikkel word met betrekking tot bespuitings, alle besluitnemers betrokke en in ooreenstemming is met mekaar. Figuur 1: Die interafhanklikheid van die elemente wat ‘n doeltreffende en effektiewe spuittoediening tot gevolg mag hê. Dit maak nie werklik saak hoe die elemente en hulle samestellende faktore uitgebeeld word nie, hulle dra almal by tot die doeltreffendheid en effektiwiteit van die spuittoediening, al is daar geldige menings om ‘n paar faktore uit te ruil ( Figuur 2).